إزاي تمنع الصدأ
سلسلة الصدأ - الجزء الأول
-
Step 1:
إزاي تمنع الصدأ
___________________________
◾ الصدا بإختصار هوا أكسدة الحديد نتيجة انه بيتعرض لرطوبة عاليه.
◾ تكلفة إصلاح الصدأ للعربيات فقط في أمريكا فقط في اخر خمس سنين كانت 16 مليار دولار دا غير الكباري و المباني و خلافة.
◾ إذاً محتاجين نعزل سطح الحديد عشان ميتعرضش لهوا فيتأكسد مع مرور
الوقت.
في طرق كتير أهمهم
1) الجلفنة (galvanization) :
أنواع الجلفنة
- الجلفنة عالسخن (Hot Dip Galvanizing)
- الجلفنة عالبارد (Zinc Electroplating)
- الجلفنة المستمره (Continuously Galvanized Sheet)
هنتكلم عن أشهر نوع
الجلفنة عالسخن (Hot Dip Galvanizing)
العمليه بتتم علي كذا مرحله
.
1. تنضيف الحديد تماما من كل الشحوم و الزيوت و الوساخة اللي عليه عن طريق اننا بنحط الحديد في حوض هيدروكسيد الصوديوم (الصودا الكاوية) العمليه دي اسمها Degreasing او Caustic cleaning.
2 . الحديد بيتشطف في حوض مايه (Rinsing).
.
3 . الحديد يتحط في حمض الهيدروكلوريك عشان يتشال طبقه رفيعه جدا من المعدن اللي بتنشأ نتيجة الدرفله عالسخن بيبقي سمكها تقريبا 0.1 ميللي و اسمها Mill scale ، ممكن تتشال بديسك صنفرة و فرشه سيلك اللي بتركب في الصاروخ بس هتاخد وقت طبعا و مش هتعرف توصل للاماكن الضيقه.
العملية دي إسمها (Pickling).
.
4 . بتتشطف في حوض مايه تاني (Rinsing).
.
5 . بتتحط في حوض فلوريد عشان تتحضر للجلفنة ، فلوريد ليه يعني
نفس فكرة اللحام بكاوية القصدير بنحط flux قبل منلحم و دا عشان يخلي القصدير ميتاكسدش و هوا منصهر و لما يتاكسد مش هيمسك كويس، في فرق ملحوظ لو لحمت من غير flux . نفس المبدأ في الجلفنه و دا بيعزز ترابط الزنك. العمليه دي اسمها (pre fluxed).
.
6 . اخر عملية الحديد بتتحط 10 دقايق او أقل في حوض الزنك (zinc kettle) ، درجة حرارته 450 celsius ، و بعد كدا الشغلانة بتتطلع وبتتساب تبرد.
الجلفنة عالسخن أفضل و أغلي من الجلفنة عالبارد ..
في مصانع جلفنة كتير في مصر منها السويدي أكبر مصنع جلفنة في الشرق الاوسط هيشتغل آخر 2020 اللي مقره العاشر من رمضان.
_________________________________________________________________________
2) دهان الاليكتروستاتيك أو الباودر (Electrostatic or Powder coating) :
أنواعه
Acrylic , Polyester , Vinyl , Nylon , Urethane , Epoxy
الايبوكسي هو الافضل من حيث انو بيحمي الحديد من الصدا و ان كان كلهم كويسين
.
الطريقه ببساطه باودر و مسدس دهان بيطلع الباودرمشحون بجهد عالي (High voltage generator ) و قطعة الحديد المراد طلائه متوصله بكابل ارضي ، فالباودر بيجري من المسدس للشغلانة و بيمسك فيها ، الشغلانة بتتحط في فرن درجة حرارته 200 و خلص الموضوع علي كدا.
في ورش الكتروستاتك في المناطق الصناعيه و عين شمس و في اللي بيحاسب بالكيلو و في اللي بيحاسب بالمتر مربع.
_______________________________________________
3) التنكيل (nickel plating ).
.
طلاء الكروم (chrome plating ).
.
طلاء النيكل كروم (nickel chrome electroplating)
.
بيعتمدو علي فكرة الطلاء الكهربي (Electroplating).
بتتحسب بوزن الشغلانة.
______________________________
4) الزيت و الشحم
.
الزيت بيمنع وصول الهوا للمعدن ..
.
عشان كدا الغنفاري (Dovetail) و صندوق التروس في المخارط و الفرايز من الخمسينات زي ما هوا مصداش بقالو 70 سنه ، عشان بيتزيت كل فتره دا غير الزيت اللي عليها.
________________________________________________
5) Bluing
و دي هنتكلم عنها في مقال منفصل.
.
.
