التعريف بالقلوظة | إستخداماتها | أنواع ذكور القلاووظ و إعتبارات هامة

سلسلة القلاووظ - الجزء الأول

  1. Step 1:

    الجزء الأول

    ___________


    القلوظة معناها إنك تعمل قلاووظ داخلي أو خارجي عشان تركب مسمار أو

    صامولة.


    القلاووظ موجود في كل حاجه من أول الموبيل، الأجهزه المنزلية لي العجل

    و العربيات و الماكينات الصناعية و خطوط الإنتاج


    في أسرار و معلومات مش موجوده في الكتب ولا المقالات و لا تُعرف إلا

    بالخبرة و الممارسة، عشان كدا قررت أعمل #سلسلة_القلاووظ


    إسمها بالعربية الفصحة اللولبة ، في السوق بيسموها تمشيط.


    أنواع القلوظة :

    1 . قلاووظ داخلي - Tapping ( الأكثر إستخداماً).

    2 . قلاووظ خارجي - Threading.

    ___________________________________

    القلوظة الداخلية (Tapping):


    عشان تعمل قلاووظ لازم تعمل تقب في الأول علي حسب المقاس بتاعك و في إستاندرد عالمي بس سيبك منه هتوجع دماغك عالفاضي و هقولك ليه .


    لو مثلا هتعمل قلاووظ M5 (مسمار 5 ميللي ، مفتاح 10) ، هيبقي قدامك خيارين يا إما القلاووظ يبقي محمل أو مش محمل .. يعني إيه برضو



    القلاووظ عشان يبقي مش محمل يعني في التمشيط هيبقي سهل و برضو لما تيجي تربط مسمار هتلاقية في سنة بوش و خفيف في الربط يبقي هتعمل تقب 4.5 ميللي والقلاووظ لو عليه أحمال هيبقي ضعيف نسبيا ..

    لو عايزه محمل هتعمل تقب 4.2 ميللي.

    ________________________________________________________

    قلاووظ ناعم (fine thread) : الاكثر استخداما خطوته بتبقي ديقه.

    قلاووظ خشن (Coarse thread) : خطوته بتبقي واسعه.

    ________________________________________________________________________________

    ليه بقولك تكبر دماغك من الإستاندرد .. مكتوب مقاسات شاذه من التقوب زي 4.2 مثلا (إنت بالعافية عندك 4 ميللي) و دي موجودة بنطها بس صعب تلاقيها في اي حتة و غالبا بتبقي إيزار (غاليه شوية).

    لو أغلب شغلك المونيوم و حديد (steel 37) اللي هوا بيتعمل منه أغلب العلب و القطاعات و الشيتات إشتغل بالإستاندرد البلدي

    Size - Pitch - drill

    M4 - 0.5 - 3.5

    M5 - 0.8 - 4

    M6 - 1 - 5

    M8 - 1.25 - 7

    M10 - 1.5 - 8.5 or 9

    M12 - 1.75 - 10.5 or 11

    _________________________________________________________________________

    عشان تعرف مقاس البنطة هتطرح مقاس القلاووظ - الخطوة يديك مقاس البنطة يعني ..

    size - pitch = drill .

    مثال : لو عايز تعمل قلاووظ M5 برضو في خطوة 0.8 ميللي .

    يبقي 5 ناقص 0.8 = 4.2 ميللي.

    __________________________________________________________________________________


    و لك مطلق الحرية هحط جدول الإستاندرد العالمي ISO metric :


    بالنسبة لقلوظة الإستانلس و الكروم و الخامات الناشفة إعمل تقب واسع علي قد متقدر عشان ممكن الدكر يتكسر منك.

    ملحوظة : في حديد طري إسمو حديد فري (Free cut steel) بيبقي طري في التشغيل و القلوظة .. و في إستانلس طري برضو بس مفيش حاجة إسمها إستانلس فري دا مسمي مغلوط في السوق.

    لو الخامة أرتيلون متعملش قلاووظ كلي .. يدوب قلوظ سنتي و شبط المسمار و خش بمفك كهربة و ربط علي كدا و كمل قلوظة بالمسمار .. كدا أحسن عشان القلاووظ ميفرولش (مينحلش).

    لو الخامة أرتيلون الماني او تيفلون إعمل قلاووظ بطول التقب ، زيه زي الحديد و الالمونيوم.

    في حالة الخامه مقطوعه ليزر ، نفترض مثلا عملت تقب 7 ميللي علي مكنة فيبر ليزر عشان تقلوظه M8 هل محتاج تنضف التقب من تاني ببنطه 7 ميللي ؟؟

    عن تجربة لو سمك الحديد أقل من 12 ميللي و المكنه نضيفه متنضفش و خش بالدكر علي طول ، لو أكبر من كدا نضف عشان السلبية بتزييد.

    لو عندك شغلانه هتعملها تنكيل أو جلفنة هيحصل مشكله لو عملت القلاووظ قبل التنكيل ؟

    مش هيجرا حاجه للقلاووظ نادرا لما يكون القلووظ مش كويس و محتاج تمشطه تاني

    _____________________________________________________________________________

    خلاص كده عملت التقب و هتبدأ تقلوظ .. محتاج بوجي و دكر.




    البوجي - Tap wrench :

    البوجي مجرد ذراع عزم .. وانت شغال هتلاقي ممانعة عشان الرايش فالتقب بيحشر مع الدكر و بتفك و تدخله تاني .. طبعا انت لو محستش بالدقرة دي و سرحت إتكسر الدكر يا ريس ...

    ..

    .

    عشان كدا لو شغال بدكر مقاسة صغير مثلا من M2 لي M6 إشتغل ببوجي قصير عشان تحس بالدقرة بسرعه و تخف ايدك أو تطلعه و تدخلة.

    بوجي سيستييم - Ratchet tap wrench :

    فيه منه قصير و طويل ، بيستخدم في التقوب المستخبية و مبتسمحش تركب البوجي و تلفه ، إسمه بوجي سيستيم و إتك علي الياء سيستييييييم .

    658x658 (Original: 960x960)

    الدكر - Tap :

    أنواع الُدكره

    1 . دكر حلزوني مدبب - Spiral point :

    بيسموه في السوق دكر الي عدل.

    إحنا بنستخدم الدكر العدل المرحلة الاولي كبديل ليه.

    ميزته بياخد الرايش لتحت مش بياخدو بشكل عشوائي زي الدكر العدل

    بيستخدم مع التقوب النفادي ، فيه 3 Flute مش 4.

    أقوي من الدكر العدل.


    ____________________________________________


    2 . دكر حلزوني - Spiral Flute :

    بيسموه في السوق دكر آلي ، بيستخدم في التقوب اللي مش نفادي.

    (يستخدم عادي مع النفادي).

    .

    أهم حاجة فيه إنه بياخد الرايش لي فوق مش لتحت .. عشان ميملاش التقب رايش و متعرفش تكمل . بس عادي ممكن تتحايل علي الموضوع تستخم دكر عدل مرحلة أولي و كل ما التقب يتملي رايش تشيل الدكر و تنضف بمسدس هوا و تخش بالمرحلة اللي بعدها.

    - بياكل بسهولة جدا جدا في الخامات الناشفة.

    عيبة إنه بيتكسر بسرعة . وغالي جدا.

    يعني الدكر M6 يوصل 140 جنيه ، في حين إن طقم الدكر العدل ب40 جنيه.







    في الصورة الدكر الحلزوني اللي علي اليمين بياخد الرايش خارج التقب مثل البنطه و الدكر اللي علي الشمال (دكر عدل) بينزل الرايش داخل التقب و في تدرج كبير (شمفر chamfer) في سنون الدكر من تحت اذا مش هيقدر يعمل قلاووظ في الجزء اللي من تحت في الثقب.


    ________________________________


    3 . دكر عدل - Straight Flute:

    بيبقي عبارة عن طقم فيه 3 دُكره ، بيستخدم مع التقب الي مش نفادي (blind hole) !

    بيبقي عباره عن طقم فيه 3 مراحل

    - المرحلة الاولي - Taper

    أول تسع سنون فيهم شمفر و متدرجين.

    - المرحلة الثانية - Plug

    أول خمس سنون.

    - المرحلة الثالثة - Bottoming

    أول سنتين.

    .

    .

    إذٱ بنستخدم ال3 مراحل في التقب الغير نفادي عشان يجيب القلاووظ لي آخر التقب.

    أما النفادي المرحلة الأولي كفاية عشان بتنزل بالدكر للآخر و بتعدي السنون اللي فيها شمفر.

    ملحوظة : المرحله الأولي الدكر بيبقي عليه خط و التانيه خطين و التالتة ولا خط ، مش كل الشركات بتعمل موضوع الخطوط.

    الدكر الألماني

    ميزة الدكر الألماني إنو مش بس متدرج و معموله شمفر ، لا كمان متدرج في القطر

    المرحله الأولي قطرها أقل من اللي بعدها وهكذا ..

    و كمان بيبقي الصلادة فيه أعلي.

    الشغل بيه بيبقي أسهل من الصيني ، عشان كدا الدكر الالماني لازم تستخم ال3 مراحل بسبب التدريج في قطر القلاووظ في كل مرحلة.

    .

    أشهر نوع ألماني Volkel ، تمنه 3 أو 4 أضعاف الصيني أو الهندي.

    _________________________


    خامة الدكر :

    - للخامات الناشفة High Speed Steel (HSS). (إستانلس ، كروم ...).

    - للخامات الطرية Carbon steel. (حديد ، ألمونيوم ، ...).

    ________________________________________________________


    طول التقب تعمله علي اي اساس ؟؟

    - أولا البنطة مدببة v shape ، طول الv دي كام ..

    طوله 0.3 * قطر البنطة.

    - أول سنتين في الدكر المرحلة التالته طولهم كام ؟

    هتجمع الطولين علي بعض + طول القلاووظ اللي انتا عايزه + السماحية 5 او 10 ميللي هيدوك طول التقب و يبقي شغلك مظبوط علي ميه بيضة.

    .

    طبعا الأنواع دي كل حاجة و ليها شغلها .. بس دا ميمنعش انك تولف الوضع علي الدكر اللي عندك و كله بيأدي الدور مع إختلاف الكفائة و الانجاز.

    ___________________________________


    - حالة القلاووظ الطويل :

    بمعني إنك عايز تعمل قلاووظ M5 طولة 4 سم ، بس الموضوع مش مستاهل القلاووظ يبقي 4 سم عشان مثلا مفيش حمل علي القلاووظ او الخامة ناشفة و الموضوع صعب و مش مستاهل.

    عشان توفر وقت و مجهود انزل ببنطة 5 ميللي عمق 3.5 سم مثلا و الباقي قلوظة بحيث اللحمية كلها متبقاش قلاووظ و يبقي معاك نص سنتي متقلوظ.

    .

    علي أي أساسا خلتها نص سنتي ؟؟؟

    صامولة المسمار ال5 ميللي بيبقي تخانته 5 ميللي و المسمار ال10 ميللي بيبقي تخانة الصاموله 10 ميللي و هكذا .. إذا انت في الأمان بالنسبه لطول القلاووظ.

    طول القلاووظ في الحديد = قطر السمار.

    طول القلاووظ في الألمونيوم = 2 في قطر المسمار.

    طبعا الخامه كمان بتحدد المعامل دا و أنت بتقدر الموضوع بخبرتك.

    ____________________________________________________________________________________

    بعد متعمل قلاووظ بتلاقي في نتوء طالعه من التقب نتيجة القلوظة ، بتشيلها بصاروخ متركب فيه صنفرة مروحية.


    الأصح إنك تعمل تخويش (Countersinking) للتقب قبل متبدأ تقلوظ أصلا .. يجوز بعد متقلوظ عادي.

    ____________________________________________


    2 . قلاووظ خارجي - threading :

    مش بيُستخدم كتير .. أغلب الوقت بيتعمل عالمخرطة

    بدل منستخدم دكر بنستخدم لقمة (Die).

    بتبقي مرحلة واحده مش 3 زي الدُكره.


    _______________________________________________________________


    التزييت :

    لازم أثناء القلوظة نحط زيت و يفضل كثافته قليلة عشان يتغلغل و ممكن زيت أكل عادي.

    ____

Comments