Tesla Cybertruck - تسلا سايبر تراك

Ayman Kidwany

15 Dec, 2021 01:20 AM

تكنولوجيا تصنيع سايبر تراك من الإستانلس إستيل

1. Step 1:

   سايبر ترك مش مجرد عربية عادية، من أول التصميم للمواصفات للسعر و تكنولوجيا التصنيع.

   
   

   

   
   

   مراجعة سريعة :

   
   

   السيارة كهربائية، بتمشي 800 كيلومتر (Range) في الشحنة الواحدة .

   
   

   تسارع من 0 لـ 100 كم/ساعة في 2.9 ثانية .

   عربيه بيك أب أسرع من بورش 911 !!

   
   

   الزجاج وجسم العربية مضادين للرصاص.

   
   

   أوتوماتك إير سسبنشن.

   تحكم في إرتفاع العربية.

   
   

   تقدر تشيل حموله وزنها طن و نص.

   
   

   قيادة ذاتية (Autopilot).

   
   

   ممكن تحجز أو تطلب العربية أون لاين عن طريق موقع تسلا و توصلك لحد البيت، الأونلاين متاح في الدول العربيه في الإمارات و الأردن فقط.

   
   

   إتحجز 300,000 عربيه في أول إسبوع من الإعلان عنها في نوفمبر 2019.

   وصل عدد الحجوزات النهارده لي 1,2000,0000 ولسه التسليم هيبدأ في 2022.

   
   

   سعر يبدأ من 40 الف دولار .

   ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ

   
   

   نتكلم في اللي يهمنا؛ تكنولوجيا التصنيع:

   
   

   بسم الله العربيه بالكامل مصنوعة من الإستانلس ستيل المقاوم للصدأ، و بكده تبقي أول عربية في العالم تتصنع من الإستانلس بشكل كمي.

   
   

   نوع الإستانلس المستخدم هو نفس النوع المستخدم في صواريخ SpaceX و هو 304L، كثرت الأقاويل إنه نوع مخصوص و شركة تسلا طورت نوع جديد بمواصفات خاصة؛ لكن في الحقيقه هو نوع عادي جدا و معروف و بيتصنع منه حلل المطابخ و ماكينات التعبئة و التغليف و متوفر في السبتية كمان .

   
   

   

   
   

   في مخرج هوا في العربية لو عاوز تزود الكاوتش أو توصل أي عده Pneumatic، و في كمان مخرج كهربا 220 فولت.

   ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

   محـــاولات فـــــاشـلة في تصنيع عربية من الإستانلس:

   
   

   ◾️ في 1930 شركة Allegheny Technologies شركه متخصصه في صناعة الإستانلس كانت عايزه تزود مبيعاتها من الإستانلس فحصل تعاون مابينها و مابين شركة فورد عشان يبداو في تصنيع موديلات فورد من الإستانلس وليس الحديد؛ أول ما بدأو في التصنيع إسطمبات (Stamping Dies) تشكيل الصاج إتدمرت عشان الإستانلس أقوي من الحديد بكتير و صعب يتعمل إسطمبات لتشكيل الإستانلس عشان هتكلف كتير جدا جدا في الإنتاج الكمي.

   
   

   

   
   

   فكان الحل بعد ما ينتهي الإنتاج من تصنيع موديل Ford 68 deluxe من الحديد يصنعوها من الإستانلس و زي ما تيجي الإسطمبات هتقدر تشكل كام عربيه قبل ما تتلف.

   
   

   
   

   فشلت الفكره و متمش إنتاج غير 14 عربيه فقط من الإستانلس من ثلاث موديلات.

   ـــــــــــــــــــــــــــــــــــــــــــــــــــــــــــــــــــــــــــــــــــــــــــ

   ◾️ في 1979 جون ديلوريان المدير التنفيذي لجينرال موتورز، فتح شركة سيارت خاصه بيه و سماها ديلوريان DeLorean DMC، عربية ديلوريان كانت شكلها الخارجي مميز جدا في الوقت دا و كان البودي مصنوع من الإستانلس، سعرها كان غالي و كان فيها مشاكل خصوصاً إنه مكنش بيصنع حاجه بنفسه و كان بيشتري كل حاجه من شركاة تانيه زي فولكس و فولفو و غيرهم .. مع العلم الإستانلس أغلا من الحديد أربع مرات و تشكيله صعب.

   
   

   

   بسبب كدا الشركه أوشكت عالإفلاس و مكنش فيه مستثمرين و المستثمرين السعوديين خلعوا .. فكان البشمهندس جون بيجيب فلوس بطريقة ما .. فسالوه بتجيب الفلوس دي كلها منين يا معلم .. قالهم ملكمش دعوه يا رجاله أهم حاجه الشركه تكمل.

   إتمسك و إتصور و هوا بيتاجر في الكوكايين مع عملاء فيدراليين عاملينله كمين و علي ما طلع من السجن كانت الشركة أفلست.

   ما إتباعش من العربيه غير 379 واحده؛ بعض الملاك مكنش بيعجبهم شكل الإستانلس فكانو بيدهنوها.

   ـــــــــــــــــــــــــــــــــــــــــــــــــــــــــــــــــــ

   إرتبط الإستانلس بعد كدا بالعربيات الفارهه؛ بمجرد متعمل جزء من العربيه من الإستانلس بيرفع من تمنها زي سقف Cadillac Eldrado و كابوت Rolls Royce Phantom, و غيرها...

   وكانت أجزاء بسيطه مفيهاش كيرفات عشان تشكيلها يكون سهل.

   
   

   

   ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

   ليه تصميم تسلا سايبرترك Tesla Cybertruck بالشكل دا و إزاي إيلون مسك قدر يصنع العربيه من الإستانلس بسعر رخيص في حين إن الإستانلس أغلي من الحديد أربع مرات و طريقة تشكيله صعبه وإيه اللي يخليه يصنعها من الإستانلس أصلاً !!

   
   

   
   

   
   

   1 . إبتكر تصميم جديد (Exoskelton) بحيث يكون الشاسيه و البودي جزء واحد زي ما في الصوره كدا؛ و دا بيزود من قوة العربيه بحيث بدل ما الإجهادات بتتوزع عالشاسيه بس .. بقت بتتوزع علي كامل الجسم و بكده وفر في الخامات في صناعة شاسية و بودي و تجمعهم و عمل جسم قوي .. مع العلم صاج اي عربيه مهما كانت بيكون 1 ميللي، في السايبر تراك 3 ميللي و دا من الاأسباب اللي مخليها مقاومه للرصاص.

   
   

   

   

   
   

   2 . حل مشكلة الإسطمبات اللي هيا أكبر تكلفه بتكون في عملية تصنيع للعربيات و بتصرف مليارات بإنه ببساطه معملش إسطمبات نهاائي و دا اللي مخلي شكل العربيه كد، العربيه ببتصنع عن طريق إن اللوح الإستانلس يتقطع ليزر و بيتني علي تنايه عادي جدا زي ما في فيديو (1).

   
   

   

   
   

   3 . وفر تكلفة ووقت الدهان بإن العربية من الإستانلس فمش محتاجه دهان.

   
   

   4 . ممانعة السحب (الهواء) Coefficient of drag للعربيه أحسن من مثيلتها في البيك أب، الCd للعربيه 0.3 و الcd اللدودج رام 0.36 الفورد F150 0.4.

   
   

   youtube.com

   
   

   - عيب العربية الوحيد إنها لو إتخبطت الخبطه هتيجي في البودي و الشاسيه اللي هما واحد فصيانتها صعبه ، دا غير إن السمكري مستحيـــل يعرف يسمكر أي عربيه زي ما كانت فبيمعجن و يرش .. في حالة الإستانلس هيعمل إيييه .

   
   

   تفتكر الناس هيدهنو العربية زي ما كان بيحصل مع DeLorean !

   و تفتكر هنلاقي حد بعد كدا يشتري موتور من الجمهورية و إستانلس من السبتية و يجمع أحلا عربيه.